Москакасси шкулӗнче ОМОН салтакне Григорий Евгеньевич Кудькова асӑнса волейбол енӗпе республикӑри турнир иртрӗ. Ентеш Дагестан Республикинчи Кизлярта служба тивӗҫне пурнӑҫланӑ чухне пуҫ хунӑ. Ҫак мероприяти ҫулленех иртет, вӑл салтак паттӑрлӑхӗпе Тӑван ҫӗршыва парӑннине асра тытма пулӑшать.

Церемоние Муркаш муниципалитет округӗн пуҫлӑхӗн тивӗҫӗсене вӑхӑтлӑха пурнӑҫлакан, «Единая Россия» партин вырӑнти уйрӑмӗн секретарӗ Александр Иванов уҫрӗ. Вӑл ҫамрӑксене патриотла воспитани парасси пӗлтерӗшлӗ пулнине палӑртрӗ. Александр Иванов ОМОН боецӗсене хӑйсене шеллеменшӗн, паттӑрлӑхшӑн тав турӗ. Ҫавӑн пекех ҫакӑн пек пулӑмсем ҫамрӑксене тивӗҫлӗхпе чыс туйӑмне ӑнланса илме пулӑшнине палӑртрӗ. Унтан хисеплӗ хӑнасем тухса калаҫрӗҫ: Чӑваш Енӗн спорт министрӗн ҫумӗ Александр Степанов, округ депутачӗсен Пухӑвӗн председателӗ Александр Давыдов, Светлана Расколова депутат тата «ОМОН-СУВАР» отряд командирӗн ҫумӗ, полици капитанӗ А.А. Ефимов. Вӗсем Григорий Кудьков паттӑрлӑхне чунтан хисепленине каларӗҫ, вӑй структурисен историйӗпе йӑли-йӗркине упраса хӑварасси пӗлтерӗшлӗ пулнине палӑртрӗҫ. Вӗренекенсемпе хӑнасем валли ОМОН салтакӗсенчен кӑтартуллӑ парне пулчӗ. Ачасем шырав йытти мӗнле ӗҫленине курчӗҫ, сапер формипе тата ятарлӑ оборудованипе паллашрӗҫ. Вӗсем ачасене питӗ тӗлӗнтерчӗҫ. Йӗркелӳҫӗсем ОМОН салтакӗсене мероприяти ирттернӗшӗн тав турӗҫ. Ҫакӑн пек тӗл пулусем патриотизм туйӑмне ҫирӗплетеҫҫӗ, спорт интересне аталантараҫҫӗ, ҫамрӑксене пӗрлештереҫҫӗ, вӗсене тӑван ен историне пӗлме пулӑшаҫҫӗ.