Тунтикун Муркаш муниципалитет округ администрацийӗн коллективӗпе анлӑ ӗҫлӗ канашлу пулчӗ. Вӑл Чӑваш Республикин муниципалитет йӗркеленӗвӗсен канашӗн директорӗ Александр Кузнецов хутшӑннипе иртрӗ. Канашлӑва ҫавӑн пекех территори пайӗсен пуҫлӑхӗсем тата округри предприятисемпе организацисен, учрежденисен ертӳҫисем хутшӑнчӗҫ.

Канашлу пуҫламӑшӗнче Александр Кузнецов Чӑваш Республикин Пуҫлӑхӗн Указӗпе Муркаш муниципалитет округӗн пуҫлӑхӗн тивӗҫӗсене вӑхӑтлӑха пурнӑҫлакан пулма Александр Иванова ҫирӗплетни пирки хыпарларӗ. Александр Иванов хӑйӗн сӑмахӗнче территорие малалла аталантарас енӗпе вырӑнлӑ йышӑнусем туни пӗлтерӗшлӗ пулнине палӑртрӗ. Вӑл округӑн малашнехи ӳсӗмӗпе аталанӑвӗшӗн усӑллӑ диалог тата тухӑҫлӑ ӗҫ йӗркелеме май пуррине ҫирӗплетрӗ.