Правительство ҫуртӗнче Чӑваш Ен Пуҫлӑхӗ Олег Николаев ертсе пынипе эрнесерен ирттерекен канашлура республикӑн 2026 ҫулхи январь уйӑхӗнчи социаллӑ пурнӑҫпа экономика аталанӑвӗн малтанхи пӗтӗмлетӗвӗсене тунӑ.

«Бюджет кӑтартӑвӗсен ӳсӗмӗ – пурӑнакансемшӗн пысӑкрах тӗллевсене пурнӑҫлама май пурри, анчах та ҫав вӑхӑтрах ку пысӑк тухӑҫлӑхпа тӗрӗслев ыйтать», – тесе палӑртрӗ Олег Николаев. Чӑваш Республикин бюджетне пурнӑҫланӑ пирки доклад тунӑ май пӗрремӗш вице-премьер – финанс министрӗ Михаил Ноздряков ҫулсерен планпа палӑртнӑ тӗллевсем самай ӳснине палӑртрӗ. 2026 ҫулта пӗрлештернӗ бюджет тупӑшне 125,5 млрд тенкӗ кӗтеҫҫӗ, тӑкакӗсем – 131,6 млрд тенкӗ. Чӑваш Енӗн Финанс министерствин ертӳҫи палӑртнӑ тӑрӑх, январь уйӑхӗнче бюджетăн мӗнпур тытӑмӗнче самай лайӑх динамика палӑрнӑ. Кӑҫалхи февраль уйӑхӗн 1-мӗшӗ тӗлне пӗрлештернӗ бюджет тупӑшӗ 10,2 процент ӳснӗ, 14 млрд тенкӗпе танлашнӑ. Бюджетӑн харпӑр хӑй тупӑшӗ 19,1 процент ӳссе 5,3 миллиард тенке ҫитнӗ. Пӗрлештернӗ бюджет тӑкакӗсем, пӗлтӗрхипе танлаштарсан, 3,4 процент ӳснӗ, 5,3 миллиард тенке ҫитнӗ. Чӑваш Республикин экономика аталанӑвӗпе пурлӑх хутшӑнӑвӗсен министрӗ Лариса Рафикова малтанлӑха палӑртнӑ тӑрӑх, 2026 ҫулхи январь уйӑхӗнче промышленноҫ производствин индексӗ пӗлтӗрхи январь уйӑхӗнчи 97 процентпа танлашнӑ, тирпейлекен производствӑсен индексӗ 96 процента ҫитнӗ. Республикӑри промышленноҫ предприятийӗсем 2026 ҫулхи январь уйӑхӗнче 42 миллиард тенкӗлӗх тавар тиесе янӑ, ҫакӑ 2025 ҫулхи январь кӑтартӑвӗнчен 8 процент пысӑкрах. Тирпейлекен производство калӑпӑшӗ, пӗлтӗрхи январь уйӑхӗпе танлаштарсан, 106 процента ҫитнӗ. Ку хамӑр туса кӑларнӑ таварсен тата республикӑри пурнӑҫланӑ ӗҫсемпе пулӑшусен пӗтӗмӗшле калӑпӑшӗн 85,7 проценчӗ шутланать. Ял хуҫалӑх производствин индексӗ 2025 ҫул пӗтӗмлетӗвӗпе 110,1 процентпа танлашнӑ. Пӗлтӗрхи ҫак тапхӑрпа танлаштарсан, ваккӑн суту-илӳ ҫаврӑнӑшӗ кӑҫалхи январь уйӑхӗнче, малтанлӑха палӑртнӑ тӑрӑх, 101,7 процента ҫитнӗ, халӑха тӳлевлӗ пулӑшу парасси – 101,5 процента.

Чӑваш Республикин Пуҫлӑхӗн Администрацийӗн пресс-служби.