Паянхи пурнăçра çынсем хушшинче час-часах диабет чирĕ пирки пăшăрханса калаçнине илтме пулать. Диабетпа чирлекенсем апата тиркесе çимелли пирки те нумай калаçнине илтме пулать. Çакă ăнсăртран мар. Çавăнпа та паян вĕсене пулăшма хăш-пĕр сĕнÿ парас тетĕп. Юнри сахăр шайне вăхăтра йĕркелесе тăма уйрăмах 7 тĕрлĕ çимĕç пулăшать. Вĕсем пирки кĕскен çапла пĕлтеретĕп:

• шывпа пĕçернĕ сĕлĕ пăттине кунсерен пĕрер турилкке çини холестерин шайне чакарма пулăшать;
• диабет чухне топинамбур уйрăмах усăллă. Хатĕрленĕ салата ăна чĕрĕлле хушма та е пахча çимĕçпе пĕрле пăшăхласа çиме те юрать;

• апатланура пахча çимĕçпе пĕрле пăшăхланă е духовкăра пĕçернĕ треска пулă пулни аван;
• кун каçа 250 миллилитр шăлан (шиповник) чейĕ ĕçни организмшăн питĕ усăллă: ăна валли каçхине термоса пĕр стакан вĕри шыв тата пĕр апат кашăкĕ шăлан çырли ярса хумалла;

• чей çине е пахча çимĕç салатне 5 – 10 грамм авăртнă корица хушни те диабет чухне аван пулăшать;
• купăстана пăшăхласа е чĕрĕлле çини чиртен пысăк усă кÿрет;
• диабет чухне кунсерен 1 – 3 стакан симĕс чей ĕçни уйрăмах вырăнлă;
• пĕчĕкшер порципе кунне 5 – 6 хут апатланни диабетпа чирлекеншĕн лайăх виçе шутланать.

Б. САМОЙЛОВ, терапевт.