Иртнӗ эрнере Муркаш округӗнче хӗллехи спорт сезонӗ старт илчӗ. Ҫатракасси шкулӗн йӗлтӗр йӗрӗ ҫинче 17 команда ӑмӑртрӗ.

Пурне те округ администрацийӗн физкультурӑпа спорт секторӗн заведующийӗ Владимир Петров саламларӗ. Ҫавӑн пекех спорт уявне хутшӑнакансене «Сывлӑх» спорт шкулӗн директорӗ Александр Куликов, Ҫатракасси территори пайӗн пуҫлӑхӗ Надежда Никитина, Чӑваш Республикин тава тивӗҫлӗ тренерӗ Вячеслав Киселев, СВО хутшӑнакан Сергей Васильев тата ыттисем ӑнӑҫу сунчӗҫ. Тӗп шкулсем хушшинче Шетмӗпуҫ шкулӗн команди чи малтан финиша тухрӗ. Иккӗмӗшпе виҫҫӗмӗш вырӑнсенче Сыпай тата Шомик шкулӗсен командисем пулчӗҫ. Вӑтам шкулсен командисен хушшинче Ҫатракасси шкулӗн пӗрремӗш командине ҫитекенни пулмарӗ, вӑл ҫӗнтерӳҫӗ тата кубок хуҫи пулса тӑчӗ. Иккӗмӗш тата виҫҫӗмӗш вырӑнсене Муркаш шкулӗн командисем йышӑнчӗҫ. Предприятисемпе организацисем тата территори пайӗсем хушшинче кубока Оринин территори пайӗн команди ҫӗнсе илчӗ.