Чӑваш Енре ҫул-йӗр ӗҫӗсен сезонӗ вӗҫленсе пырать. Вӑл пирӗншӗн ӑнӑҫлӑ пулчӗ. Эпир юсанӑ участоксен калӑпӑшне пӗлтӗрхинчен виҫӗ хут ӳстертӗмӗр. Ҫак пысӑк улшӑнусене федераци тата республика бюджечӗсен шучӗпе те пурнӑҫа кӗртетпӗр. Хӑйӗн телеграм-каналӗнче Чӑваш Республикин Пуҫлӑхӗ Олег Николаев ҫапла пӗлтерет.

«Пурнӑҫ валли инфратытӑм» наци проекчӗпе килӗшӳллӗн Шупашкар округӗнчи «Шупашкар –Сурское» трассӑн 9 километр ҫулне срокчен юсаса пӗтернӗ. Лаптӑка пӗтӗмпех ҫӗнетсе нормативлӑ лару-тӑрӑва кӗртнӗ. Ӗҫе 100 млн тенкӗ ытла янӑ, ҫав шутран 80 млн ытла – федераци укҫи. Палӑртнӑ 120 ҫухрӑм регион ҫулӗсенчен 116 ҫухрӑмне ҫӗнетнӗ те ӗнтӗ. Ҫакӑ такӑр та хӑрушсӑр ҫулсем ытлараххине, авариллӗ участоксем сахалраххине тата пин-пин водительпе пассажиршӑн хӑтлӑх палӑрмаллах ӳснине пӗлтерет.