Кун пирки Чӑваш Республикин Пуҫлӑхне Чӑваш Енӗн транспорт тата ҫул-йӗр хуҫалӑхӗн министрӗ Максим Петров эрнесерен ирттерекен планеркӑра пӗлтернӗ. Регионӑн Ҫул-йӗр фончӗ кӑҫалхи тӑхӑр уйӑхра мӗнле пурнӑҫланнине малтанласа пӗтӗмлетнӗ.

2025 ҫулта Ҫул-йӗр фончӗн пӗтӗмӗшле укҫи-тенкин калӑпӑшӗ 9 миллиард тенкӗ ытла пулнӑ. Ҫав шутран федераци бюджетӗнчен субсиди – 1,5 миллиард тенкет яхӑн, республика бюджетӗнчен укҫа-тенкӗ – 7,6 миллиард тенкӗ ытла. 2025 ҫулхи октябрӗн 17-мӗшӗ тӗлне пурнӑҫлани 5,7 млрд тенкӗпе танлашать, ку планпа пӑхнӑ калӑпӑшӑн 63,2 проценчӗ пулать. Автомобиль ҫулӗсен регионти сетьне юсамалли калӑпӑш иртнӗ ҫулхинчен 3 хут ӳснӗ. Кӑҫал ҫул-йӗр ӗҫӗсем, пӗлтӗрхипе танлаштарсан, 1,1 миллиард тенкӗлӗх ытларах хӑвӑртлӑхпа пыраҫҫӗ. Ҫав шутра пуҫарулӑх бюджечӗн проекчӗсене пурнӑҫа кӗртме кӑҫал республика бюджетӗнчен 349 млн тенкӗ пӑхса хӑварнӑ, 259 ҫул-йӗр объектне ӗҫе кӗртме палӑртнӑ. Паянхи куна 2025 ҫулхи пӗтӗмӗшле укҫа-тенкӗ калӑпӑшӗн 72,1 процентне (244 млн тенкӗ) алла илнӗ. Чӑваш Республикин Пуҫлӑхӗ Олег Николаев «НИМЕ – халӑх бюджечӗ» проектпа килӗшӳллӗн пыракан ҫул-йӗр строительствин объекчӗсене, ҫавӑн пекех обществӑлла вырӑнсенче тротуарсем тӑвассине тӗрӗслесе тӑма хушнӑ.

«Пуҫарулӑх бюджечӗ урлӑ укҫа-тенкӗ уйӑракан ҫул-йӗр проекчӗсене пурнӑҫланине тӗрӗслемелле тесе шутлатӑп. Уйрӑмах Шупашкар тата Ҫӗнӗ Шупашкар хулисенче. Ҫавӑн пекех нумай вӑхӑт хушши юсаман тротуарсен шайне хаклани те пӗлтерӗшлӗ. Пирӗн проектсем мӗнле пурнӑҫланнине, вӗсем ял-йыш кӗтнипе килӗшсе тӑнине ӑнланса илмелле. Ҫулсене тытса тӑрас ӗҫе уҫӑмлӑн планласси тата подрядчиксене ҫирӗп требованисем палӑртасси, ҫав шутра кирлӗ технологи хатӗрӗпе ҫул хӗрринчи тӑрӑха пӑхасси те, тӗп ен шутланать», – палӑртрӗ вӑл. 2025 ҫулта пӗтӗмӗшле 530 ҫухрӑм автомобиль ҫулӗсене юсама палӑртнӑ: асфальт сарни 310 ҫухрӑм, 220 ҫухрӑм тӑпраллӑ ҫулсем. Чӑваш Енре «Пурнӑҫ валли инфратытӑм» наци проекчӗ пурнӑҫланать. Ун шайӗнче Чӑваш Ен Транспорт министерстви умӗнче регион ҫулӗсен тӳпи нормативлӑ лару-тӑрура 50 процент, Шупашкар агломерацийӗнче 85,1 процент таран ӳстерес тӗллев тӑрать. Паянхи куна бюджет укҫи-тенкине алла илесси ҫапла пулса пырать:

- регион тата вырӑнти ҫулсене тытса тӑрасси тата юсасси: палӑртнӑ калӑпӑшран 67 процент;

- строительствӑпа реконструкци: пӗтӗмӗшле 37,9 процент.

Ҫавӑн пекех кӗперсене тата искусствӑлла сооруженисене тӗпрен юсас, урамсене ҫутатмалли сетьсем тӑвас тата транспорт инфратытӑмӗн хальхи технологийӗсене ӗҫе кӗртес ӗҫ пырать.