Юпа уйăхĕ хăй уттипе пырать. Ял çыннине вăл сивĕ хĕл кунĕсене хатĕрленме ыйтать. Паян вара сивĕпе ăшă выляса тăни – çанталăк сивĕ хĕле кĕтнине систерекен паллă. Хĕл сиввисемччен вăхăт пур-ха. Сивĕсем вăй иличчен ялта килти хушма хуçалăх тытаканăн пахчара юлнă ĕçсене тепĕр хут тĕплĕн пăхса тухмалла.

Малашлăхпа пурăнакансем чÿк уйăхне кĕриччен е унăн малтанхи кунĕсенче пулакан сивех мар, анчах типĕ кунсенче улма-çырла йывăççисен вуллисене шуратаççĕ. Малтанхи сивĕсем çитсенех винограда хĕл каçарма вырнаçтараççĕ. Çулçăсем тăкăнса пĕтсенех кил хуçин пахчара вĕсене шăлса тасатассипе ĕçлемелле. Сад-пахча хĕле таса та тирпейлĕ кĕтĕр, шăшисене ан астартăр. Ĕлкĕрмен пулсан çĕр улми пуссине сухалаттарма та кая юлман. Сухалаттарнă çĕр тарăнрах шăнать, ытларах нÿрĕк тытса хăварать. Ку вăл – çитес çулхи тухăçшăн. Кунпа пĕрлех кĕрхи ыхра шутра пулни ял çыннишĕн вăрттăнлăх пулманран ăна лартса хăварассине те ан манăр.

А. ШАРИКОВ. Тереç ялĕ.