Алă айĕнчине пăхмасăр тепĕр чух эпир лайăххине шыраса инçе çула тухатпăр. Чир-чĕртен сипленме аптекăна хыпаланнине те çавăнпах танлаштармалла. Çав вăхăтрах пахчари йăран çинче мĕн чуль эмел! Паллашар-ха вĕсемпе.

Укроп юн пусăмне, чĕре ĕçне йĕркелет. Çавăн пекех вăл организмран наркăмăшсене кăларма пулăшать, сывлăш çулĕсене уçать. #слĕкпе аптăрасан та халăх медицини укроп шывне ĕçме сĕнет.

Салат нервсене лăплантарать. Ăна çисен организмра холестерин пухăнмасть. Вăл чĕре, пĕвер, вар-хырăм чирĕсемпе чирлекенсемшĕн усăллă.

Баклажан юнри холестерин хисепне палăрăмлă чакарать. Вăл уйрăмах атеросклероз чирĕпе аптăракан çынсемшĕн питĕ усăллă.

Ревеньрен хатĕрленĕ апат-çимĕç çисен хырăмлăх тата пĕвер лайăх ĕçлеççĕ.

Сельдерей организмра ытлашши тăвар пухăнасран хÿтĕленипе палăрса тăрать.

Петрушка А тата С витаминсемпе пуян. Пĕвер тата пÿре чирĕсемпе нушаланакансемшĕн вăл сиплĕ пулни паллă.

Алевтина СОЛОВЬЕВА, терапевт