Чăваш Республикин Пуçлăхĕ Олег Николаев Раççей МЧСĕн Атăл тăрăхĕнчи федера­ци округĕнчи территори пайĕсен ертÿçисен Канашĕн председателĕпе, шалти ĕçсен службин генерал-лейтенанчĕпе Валерий Синьковпа ĕçлĕ канашлу ирттернĕ. Ертÿçĕсем республикăра чрезвычайлă лару-тăруран сыхланас тата асăрхаттарас мелсемпе хатĕр­сене тата кунти комплекслă вăйсене аталантарассине сÿтсе явнă.

 «2028 çул тĕлне халăха вăл е ку ыйтупа вăхăтра пĕлтерсе тăрассипе ĕçлеме пирĕн ĕç планĕ пур», – çирĕплетсе каланă Чăваш Ре­спубликин Пуçлăхĕ Олег Николаев.

Иртнĕ икĕ çул хушшинче халăха пĕлтер­се тăрас системăна модернизацилеме 300 млн тенкĕ ытла хывнă, сасă паракан куçарса çÿремелли 283 устройствăна тата халăха пĕл­терессине йĕркелесе пыма муниципалитет системин 26 пультне вырнаçтарнă. 2025 çул валли çирĕплетнĕ ĕçсен планĕпе илсе тухса çÿремелли сасă паракан 133 акустика устрой­ствине вырнаçтарма тата информаци хăруш­сăрлăхне пурнăçа кĕртме пăхнă.

Калаçу вăхăтĕнче вĕсем Чăваш Респу­бликин МЧС службин аталанăвĕн уйрăм кăтартăвĕсем çинче те чарăнса тăнă. Уйрăмах юлашки 5 çул хушшинче пушарпа кĕрешме мĕн чухлĕ тимлĕх уйăрни пирки калаçнă. Ре­спубликăра иртнĕ 5 çулта пушарпа кĕрешес службăн пурлăхпа техника базине çĕнетме 265 млн тенкĕ уйăрса пама пултарнă. 2025 çулта кăна пысăк çÿреслĕхлĕ пушар сÿнтер­мелли автоцистернăсене тата пулăшмалли техника туянма республика 71 млн тенкĕ уй­ăрнă. Чăваш Республикинчи пушар хуралĕ па­янхи куна 222 подразделенирен тăрать. Унта службăна 2 пин çын ытла тухать. Ирĕке кайнă вут-кăварпа кĕрешмелли техника Чăваш Енре пĕтĕмпе 421 единица пур.

Пушар хуралĕ пирĕн республикăра аталан­са-çĕнелсех пырать. 2020-2024 çулсенче пу­шар чаçĕсен 4 уйрăм постне йĕркеленĕ. Вĕсем 57 яла хÿтлĕхе илнĕ. 2025 çул пуçланнăранпа кунашкал постсем республикăра çĕнĕрен 2 уçăлнă. Çывăх 3 çулта пушарпа кĕрешмелли 8 подразделение тата пушарпа кĕрешмелли ирĕклĕ пушар хуралĕн 42 подразделенине çĕнĕрен йĕркелеме пăхаççĕ. Çакă республикă­на «хĕрлĕ автанран» хÿтĕлессине палăрмал­лах ÿстерме май парать.

Уйрăм сăмах вăрман пушарĕсем тата вĕсен­чен хÿтĕленесси пирки. Паянхи куна вăрманти пушарсемпе кĕрешме республикăра 42 станци службăра тăрать. Вĕсенче пушар сÿнтермелли 155 техника, «хĕрлĕ автанпа» вăхăтра кĕреш­мелли 887 единица ятарлă оборудовани тата 11 единица БПЛА пур. Вăрманти пушарсене вăхăтра тупса палăртма республикăра видео­мониторинг системи ĕçлет.

Юлашки вăхăтра Чăваш Республикинче Раççей Федерацийĕн МЧСĕн подразделе­нийĕсене тĕрлĕ çулпа çÿреме пултаракан 4 «Нива» автомашина, тулли приводлă «Со­боль» тата аварипе çăлав оборудованиллĕ КАМАЗ пушар автоцистерни килсе çитнĕ.

Федераци тата регион бюджечĕсен укçи-тенкипе туяннă техникăн уççисене респу­бликăри çăлавçăсене Раççей МЧСĕн Атăл тăрăхĕнчи федераци округĕнчи территори пайĕсен ертÿçисен Канашĕн председателĕпе, шалти ĕçсен службин генерал-лейтенанчĕпе Валерий Синьковпа республика премьер-ми­нистрĕ Сергей Артамонов панă.

Тĕрлĕ çулпа çÿреме пултаракан техника вăй илнĕ пушарсем патне хăвăртрах çитме пулăшмалла. Тулли туртăмлă «Соболь» авто­машинăпа усă курса пирĕн çăлавçăсем БПЛА­семпе анлăрах усă курма пуçлĕç. Ку вăл пушар хăрушсăрлăхне тĕпрен лайăхлатма пулăшĕ. «Нива» автомашинăсем вара Патăрьел, Мур­каш тата Шупашкар округĕсенчи патшалăх пушар инспекторĕсемпе дознавательсен ĕçне тĕпрен лайăхлатма май памалла.

Хамăр инф.