Хĕрÿ çу кунĕсенче ял çыннин пĕр пушă вăхăт та çук. Ĕçрен таврăнсан пурте пахчана васкаççĕ. Выльăх-чĕрлĕх тытакансен ĕçĕ тата ытларах. Ял çынни йынăшма хăнăхман, пурне те ĕлкĕрет. Çы­рлине те пуçтарать, хăярне те тăварлать, ĕнине те сăвать.

Муркаш тăрăхĕнче пурăнакансем вара ятарлă çар опе­рацине хутшăнакан салтаксене пулăшма та вăхăт тупаççĕ. Акă Чуманкассинчи Культура çуртĕнче маскировка сетки çыхакансем пуçтарăнаççĕ, çĕнтерĕве хăйсен тÿпине хы­ваççĕ. Тылпа фронт пĕрлĕхĕ тăшмана хăвăртрах çапса аркатма май панине ăнланаççĕ вĕсем.

– Ку хутĕнче сетка çыхмалли япаласене вĕсем хăйсем туяннă. Ялти хĕрарăмсене тав сăмахĕ калатăп. Çакăн пек çынсем пуррипе пирĕн Раççей хăватлă, – çапла пĕлтерет «Моргаушцы- ZА Победу!» ушкăн волонтерĕ Андрей.