Июлĕн 16-мĕшĕнче Муркаш муниципалитет округĕнче Пĕрлехи информаци кунĕ пулчĕ. Ăна ирттерме Чăваш Республикин Гражданла оборона тата чрезвычайлă лару-тăру ĕçĕсен министрĕ Сергей Павлов килчĕ. Чи малтанах информаци кунĕ шайĕнче йышăну иртрĕ. Унта Сергей Павлов, округ пуçлăхĕ Алексей Матросов, Чăваш Респу­бликин Патшалăх Канашĕн депутачĕ Александр Федотов хутшăнчĕç, пĕр çыннăн çĕрпе çыхăннă кăткăс ыйтăвне сÿтсе яврĕç.

Ĕç кунĕ Çатракасси территори пайĕн­че иртрĕ: Кашмашри Культура çуртне ял çыннисем пухăнчĕç, Кашмашри шкулта – учительсен коллективĕ. Тĕл пулусенче ĕç ушкăнĕ çулталăкăн пĕрремĕш çурринчи социаллă пурнăçпа экономика кăтартăвĕн малтанхи пĕтĕмлетĕвĕпе тата бюджета пурнăçланипе паллаштарчĕ. Çавăн пекех Чăваш Республикин Пуçлăхĕн Олег Ни­колаевăн çĕнĕ социаллă проекчĕсене хак пачĕç. «Ниме – халăх бюджечĕ», «Сывлăх патне пĕр утăм ту», «Чăваш Енти савăнăçлă çу кунĕсем», «Мирлĕ пурнăçа утăм ту» проектсем мĕнле ĕçленине çынсем туйма ĕлкĕрчĕç ĕнтĕ. «Сывлăх патне пĕр утăм ту» проект уйрăмах ял çыннисемшĕн мел­лĕ. Сывлăха тĕрĕслекенсем Çатракасси тăрăхĕнче те пулчĕç. Çынсем çавăн пек ĕçшĕн республика ертÿлĕхне тав турĕç.

Территори пайĕн пуçлăхĕ Надежда Ни­китина каланă тăрăх, вĕсем тĕрлĕ програм­мăна хутшăнаççĕ, пуçарулăх бюджечĕпе çитес çул 7 проект пулмалла, вăл шутра 2-шĕ – Кашмашра. «Сирĕн пуçлăх Наде­жда Геннадьевна питĕ активлă çын, вырăн­ти хăтлăх ĕçĕсемшĕн чылай тăрăшать», – терĕ Алексей Матросов. Галина Ершова та çак шухăша çирĕплетрĕ.

Алексей Матросов каланă тăрăх, окру­гра кăçал пуçарулăх бюджечĕн програм­мипе 63 проект 211,1 млн тенкĕлĕх пур­нăçламалла. Маларахри çулсенче çул-йĕр ытларах юсанă, халĕ ял çыннисем шыв çыхăнăвĕсене юсасси çине тимлĕх ытла­рах уйăраççĕ. Иртнĕ çул шыв пăрăхĕсене 35 км юсанă, кăçал 30 км юсама палăртнă.

Сергей Павлов республикăра ку енĕпе мĕнле ĕçленипе паллаштарчĕ. Регионта кăçал 1555 пуçарулăх проектне вăя кĕр­тессипе ĕçлеççĕ. Çавăн пекех вăл регион пуçлăхĕн проекчĕсем çинче чарăнчĕ. «Сы­влăха тĕрĕслекен хулари мобильлĕ пун­ктра эпĕ те пулса куртăм, çыннисем йыш­лăн, сывлăха тĕрĕслеттерме питĕ меллĕ», – терĕ вăл.

«Сывлăх патне пĕр утăм ту» проект шайĕнче 15 кун хушшинче пĕтĕмпе ре­спубликăра 14555 çын хăйĕн сывлăхне тĕрĕслеттерме пултарнă. Ку ĕç чир-чĕре вăхăтра тупса палăртма тата сиплеве ма­ларах пуçлама май парать.

Сергей Павлов муркашсене тĕрлĕ ĕçре тăрăшуллă та пуçаруллă пулнăшăн тав турĕ. Çавăн пекех вăл шыв çинчи хăрушсăр­лăх пирки аса илтерчĕ, уйрăмах ачасемпе асăрхануллă пулмаллине каларĕ. Шел пу­лин те, республикăра ача шыва путса вилнĕ факт пур.

Учительсен коллективĕ шкул пурнăçĕпе çыхăннă ыйтусене хускатрĕ.

Роза ИЛЛАРИОНОВА.