Чăваш Ен Пуçлăхĕ Олег Николаев çемье пĕлтерĕшĕ пысăккине çапла палăртать: «Çемье вăл – сывлăхлă обществăпа хăватлă патшалăх никĕсĕ. Пире вăйлăрах тăвакан йăла-йĕрке, пахалăхпа юрату шăпах та çемьере никĕсленет». Çемье, юратупа шанчăклăх кунĕ самай çамрăк уяв шутланать. Çак куна çветтуй Петрпа унăн Феврони мăшăрне халалласа ирттереççĕ. Вырăс православи чиркĕвĕ Петрпа Февро­ние мăшăрсене хÿтĕлесе тăракансем тесе палăртать. Çемье кунне Муромра – çветтуйсен хăвачĕсем упранакан вырăнта – 1990 çулсенче паллă тума тытăннă. 2008 çулта вара халăх уявне хула тулашĕнче пĕрремĕш хут ирттернĕ. Ăна çулсеренех июлĕн 8-мĕшĕнче уявлаççĕ. Раççей Президенчĕ Владимир Путин уява официаллă палăртасси пирки 2022 çулхи июнĕн 28-мĕшĕнче йышăну тунă. Уявăн тĕп тĕллевĕ – çемье йăли-йĕркине упрама вĕрентесси, ачасемпе çамрăксене ку енĕпе ăс-хакăл воспитанийĕ парасси. Сăн ÿкерчĕкре Муркаш ялĕнче пурăнакан Людмила Прокопьевнăпа Георгий Максимо­вич Пушкинсене куратăр. «Бриллиант» мăшăр – пысăк ятлă-сумлă. Ырă тĕслĕхри çынсем кăçал 60 çулхи юбилей уявне паллă турĕç. Çак çавра çула çирĕплетсе вĕсем Юби­лярсен хисеплĕ кĕнекине алă пусса çирĕплетрĕç, пĕр-пĕрне саламласа ăшшăн çупăрларĕç. Çемье пуçĕ – Ге­оргий Максимович хăйĕн ĕç ĕмĕрне «Передовик» хуçалăхра пуçланă. Ун хыççăн Мур­кашри «Автотехсервисра» води­тельте тата каменщикра ĕçленĕ. Кил-çурт вучахне упракан Люд­мила Прокопьевна та мăшăрĕ ĕçленĕ хуçалăхра тимленĕ, ĕне­сенчен пысăк сăвăм илессишĕн тăрăшнă. Каярах вара Шупашкар хулинче, республика больницин­че, санитаркăра ĕçленĕ. Ĕçне кура – хисепĕ. Мăшăр «Ĕç ветеранĕ» ят тата тĕрлĕ на­града илме чыслă пулнă. Хисеплĕ мăшăр виçĕ ывăл ÿстерсе пурнăç çулĕ çине тăрат­нă, вĕсене тивĕçлĕ пĕлÿ панă. Паянхи кун мăшăра пилĕк мăнукĕпе пĕр кĕçĕн мăнукĕ савăнтарать.

Роза ИЛЛАРИОНОВА.