Чăваш Республикин Пуçлăхне суйлама июнĕн 25-мĕшĕнче пĕрремĕш кандидат – Олег Алексеевич Николаев – документсен пуххине республикăри Суйлав комиссине тăратнă. Вăл суйлава хăйне хăй тăратнă кандидат евĕр хутшăнать.

Олег Николаев хăйĕн телеграм-каналĕнче çапла çырнă:

– Ку йышăну эпир юлашки çулсенче тунă ĕçсене малалла тăсни пулать. Çак тапхăрта нумай тума пултартăмăр: çулсемпе шкулсем тунă, промышленноçпа агропромышленноç комплексĕ малалла аталанаççĕ, бизнеспа социаллă сферăна пулăшатпăр, уйрăмах пулăшу кирлисене тимлĕх уйăрмалли программăсем пурнăçланаççĕ, – тенĕ вăл.