«Раҫҫей спорчӗ» патшалӑх программине пурнӑҫа кӗртнӗ май Муркаш округӗнче яланах тӗрлӗ спорт ӑмӑртӑвӗсем иртеҫҫӗ. Хастар пурнӑҫ йӗркине ҫулсем иртни чарма пултарас ҫук. Ҫакна аслӑ ӑру ҫыннисем хӑйсен тӗслӗхӗпе ҫирӗплетеҫҫӗ.

Спорт ветеранӗсемшӗн анчахрах чӑн-чӑн туртӑм центрӗ Мӑн Сӗнтӗр шкулӗ пулчӗ. Унта нумаях пулмасть Мӑн Сӗнтӗр зонинчи территори уйрӑмӗсен пенсионерӗсем хушшинче ӑмӑртӑвӑн пӗрремӗш тапхӑрӗ иртрӗ. Турнира 5 команда хутшӑнчӗ: Мӑн Сӗнтӗр, Ильинка, Катькас, Москакасси тата Юнкӑ территори пайӗсен представителӗсем. Ӑмӑрту программи пуян та тӗрлӗ енлӗ пулчӗ. Кашни пенсионер хӑйӗн вӑйлӑ енӗсене кӑтартма пултарчӗ. Ветерансем хавхаланса тупӑшрӗҫ: шахматпа шашка вӑййисенче, пӑшалтан перессипе, ҫӑмӑл атлетика кросӗнче, дартс енӗпе, пӗрлехи эстафетӑра. Тупӑшу ҫивӗч иртрӗ. Пенсионерсем спартакиадӑн иккӗмӗш тапхӑрне каймалли путевкӑшӑн ӑмӑртрӑҫ-ҫке. Анчах тӳрӗ кӑмӑллӑ кӗрешӳ туслӑ атмосферӑна ҫеҫ ҫирӗплетрӗ. Унта хутшӑнакансем пӗр-пӗрне хисеплени курӑнчӗ, тӗл пенӗ е хӑвӑрт финиша ҫитнӗ ятпа пӗр-пӗрне чун-чӗререн саламларӗҫ. Хӗрӳ кӗрешӳ пӗтӗмлетӗвӗ тӑрӑх призлӑ вырӑнсене ҫапла пайларӗҫ:

I вырӑн – Мӑн Сӗнтӗр территори пайӗн команди,

II вырӑн – Юнкӑ территори пайӗн команди,

III вырӑн – Ильинка территори пайӗн команди.

Кун пек ӑмӑртусем Чуманкасси тата Ҫатракасси территори пайӗсенче те иртрӗҫ. Унта ҫывӑхри территори пайӗсенчи командӑсем хутшӑнчӗҫ. Кашнинче пилӗкшер команда тупӑшрӗ. Кунта та хӑйсем хушшинче чи вӑйлӑ коллективсем палӑрчӗҫ. Чи лайӑххисен ятне илессишӗн кӗрешесси малалла пырать. Виҫӗ зона ушкӑнӗн ҫӗнтерӳҫисем тата призер командӑсем тӗл пулӑва хатӗрленеҫҫӗ. Вӗсем «Ветерансем чунпа ватӑлмаҫҫӗ» ятлӑ культурӑпа спортӑн пысӑк фестивалӗн формачӗпе иртекен финал тапхӑрне кӗтеҫҫӗ. Финал август уйӑхӗнче иртет. Вӑл сывлӑхӑн, хастарлӑхӑн тата хастар вӑрӑм ӗмӗрӗн чӑн-чӑн уявӗ пулса тӑрӗ. Турнир граждансене физкультурӑпа тӑтӑшах туслă пулма хавхалантарас ӗҫре «Раҫҫей спорчӗ» патшалӑх программин тухӑҫлӑхне уҫҫӑн кӑтартса парӗ.