Муркаш муниципалитет округӗнче «Пурнăҫ инфратытăмĕ» нацпроект шайӗнче «Тойкилтӗ – Кӗртекасси» автомобиль ҫулне юсасси малалла пырать.

Март уйӑхӗн 30-мӗшӗнче округ администрацийӗ уйрӑм предпринимательпе И.П. Шишкинпа контракт тунӑ. Договор условийӗсемпе килӗшӳллӗн, подрядчик мӗнпур ӗҫе июлӗн 31-мӗшӗччен вӗҫлеме сӑмах парать. Кӑҫал Тойкилтӗ ялӗ еннелле 2,5 километр тӑршшӗ участокра юсав ӗҫӗсем пыраҫҫӗ. Ҫак тӗллевпе 25 млн тенкӗ ытла уйӑрнӑ. Паянхи кун ҫул хӗррине анлӑлатнӑ, асфальт сарнӑ: тикӗслекен тата тӗп сийсем ҫине. Ҫул хӗррине сарасси юлнӑ. Пӗлтӗр ҫак нацпроект шайӗнче «Тойкилтӗ – Кӗртекасси» автоҫулӑн 3410 метрне юсанӑ. Малтан – 2,49 километр трассӑна. Унтан бюджет укҫи-тенкине перекетленипе тата 920 метра яхӑн ҫул-йӗре Кӗртекасси ялӗ таранах юсама пултарнӑ. Ку ҫула тата маларах юсанине аса илтермелле. Сӑмахран, участокӑн 2 километрне унчченхи «Хӑрушлӑхсӑр паха ҫулсем» нацпроект шайӗнче 2023 ҫулта ҫӗнетнӗ. 2024 ҫулта вара пӗтӗмӗшле ултӑ километра яхӑн тӑсӑлакан виҫӗ уйрӑм участокра юсанӑ. Ҫапла вара юлашки ҫулсенче «Тойкилтӗ – Кӗртекасси» ҫула 14 километра яхӑн юсанӑ.