Правительство ҫуртӗнче эрнесерен иртекен канашлура «Сывлӑх патне – утӑм» медицина проекчӗн малтанхи пӗтӗмлетӗвӗсене сӳтсе явнӑ.

Чӑваш Республикин Пуҫлӑхӗ Олег Николаев муниципалитет пуҫлӑхӗсене тухса ҫӳрекен медицина бригадисен ӗҫӗ пирки халӑха хастартарах пӗлтермеллине каланӑ. Ҫавӑн пекех «Сывлӑх патне – утӑм» проектпа чи малтан ял территорийӗсенче пурӑнакансемшӗн анлӑ усӑ курма майсем туса пама хушнӑ. Вӑл ҫавӑн пекех, кирлӗ пулсан, ватӑсемпе утма кансӗр граждансене сывлӑх пункчӗсем патне транспортпа турттарассине йӗркелеме сӗннӗ. «Проектӑн тӗп тӗллевӗсенчен пӗри – хамӑр сывлӑха упрасси пирки ҫынсене каласа парасси. Тулли информаци иртерех профилактика тума пулӑшать, потенциаллӑ чирсене хӑвӑрт асӑрхаттарма май парать, – палӑртрӗ Олег Николаев. – Пирӗн медиксем ӗҫе питӗ лайӑх йӗркелеҫҫӗ. Халӗ ҫынсем ҫак пулӑшусемпе вӑхӑтра усӑ курма пултарни пӗлтерӗшлӗ. Ҫынсем тухтӑрсем килнине факт хыҫҫӑн е ӑнсӑртран пӗлнӗ лару-тӑрӑва сирес пулать. Халӑха, уйрӑмах ялсенче, пӗлтермелли тытӑма критикӑлла хаклама ыйтатӑп». Мобильлӗ медицина комплексӗсен ӗҫӗ мӗнле пыни пирки Чӑваш Республикин сывлӑх сыхлав министрӗ Лариса Тарасова пӗлтернӗ. Июль уйӑхӗн 20-мӗшӗ тӗлне профилактика тӗрӗслевне 23 747 ҫынна явӑҫтарнӑ.

Ҫу пуҫланнӑранпа республикӑри кашни муниципалитет округӗнче «Сывлӑх пункчӗсем» ӗҫлеме ӗлкӗрнӗ ӗнтӗ. Тухтӑрсем 16 пин ытла пациента йышӑннӑ. Вӗсенчен 2,8 пин ытла ҫынна хушма тӗрӗслеве янӑ. Кӑҫал ӗҫ форматне халӑх ыйтнине шута илсе самай анлӑлатнӑ. Диагностика ирттерме мобильлӗ бригадӑсем ӗҫ паракансен заявкисемпе предприятисене тухса ҫӳреме тытӑннӑ. Тухтӑрсем Шупашкарти, Канашри тата Улатӑр округӗсенчи ултӑ организацире 679 сотрудника тӗрӗсленӗ ӗнтӗ. Ӗҫе пула вырӑнти поликлиникӑна ҫитсе курайманнисемшӗн ку питӗ меллӗ. Ватӑсем ҫинчен те манмаҫҫӗ медиксем. Шупашкарта 65 ҫултан аслӑрах пациентсене уйрӑмах тимлӗх уйӑрнӑ. Ҫулталӑк ытла медицина пулӑшӑвӗ ыйтманнисем кардиолог, невролог, эндокринолог, офтальмолог тата гериатр консультацийӗсем илнӗ – пурӗ 1155 пенсионер. Ҫак ҫул-йӗрпе килӗшӳллӗн медицина профилактика мероприятийӗсем октябрӗн 1-мӗшӗччен пырӗҫ. Унсӑр пуҫне регионта сывлӑх енӗпе ӗҫлекен ансӑр профильлӗ пуйӑссем йӗркелеҫҫӗ. «Ача-пӑча тухтӑрӗ» проект республикӑри 2,7 пин ытла ҫамрӑк ҫынна тӗрӗслеме пулӑшнӑ. Ятарлӑ «Кардиопоезд» вара 1267 ҫыннӑн чӗрепе юн тымарӗсен сывлӑхне тӗрӗслеме май панӑ. Хӑрушлӑх факторӗсене тупса палӑртнӑ пациентсене хӑвӑрт тӗпчеме яраҫҫӗ. Тухса ҫӳрекен бригадӑсен расписанине Чӑваш Республикин Сывлӑх сыхлав министерствин официаллӑ сайтӗнче вырнаҫтарнӑ. Чӑваш Республикин Пуҫлӑхӗн «Сывлӑх патне – утӑм» проектне пурнӑҫа кӗртесси малалла пырать. Кӑҫал специалистсем вырӑнсене пурӗ 500 хут ытла тухса ҫӳреме палӑртнӑ. Чӑваш Республикин Пуҫлӑхӗн «Сывлӑх патне – утӑм» проектне пурнӑҫлани пирки Муркаш район тӗп больницин тӗп тухтӑрӗ Оксана Попова ҫапла каласа парать. Оксана Попова кӑҫал ҫак проектпа килӗшӳллӗн 18 хут ҫула тухма палӑртнине каларӗ. «Сывлӑх патне – утӑм» кӑҫал кардиопоездпа тата ачасен сывлӑх пуйӑсӗпе пуянланчӗ. Кардиопоезд (кардиологсем, неврологсем) пирӗн округа сентябрь уйӑхӗнче ҫитӗ. Пирӗн округра «Ача-пӑча тухтӑрӗ» сывлӑх пуйӑсӗ вара июнӗн 23-мӗшӗнче 275 ачана йышӑнчӗ. «Сывлӑх патне – утӑм» проект шайӗнче «Сывлӑх пункчӗ» 4 хутчен ҫула тухрӗ. Пурӗ 485 ҫын сывлӑхне тӗрӗсленӗ, вӗсенчен 86 ҫынна малалла тӗрӗслеме янӑ. Ытларикун мобильлӗ бригада Оринин территори пайӗнче ӗҫлерӗ.