«Пӗрлӗхлӗ Раҫҫей» пулӑшнипе пурнӑҫланакан «АСАМ» фестиваль виҫӗ ҫул хушшинче шкул театрӗсене тата ачасен пултарулӑх хӑнӑхӑвӗсене аталантармалли пӗлтерӗшлӗ площадка пулса тӑчӗ.

Чӑваш Енре шкул театрӗсен «АСАМ» регион IV фестивалӗ пуҫланчӗ. Ӑна апрель уйӑхӗн 1-мӗшӗнче Чӑваш патшалӑх культурӑпа искусство институчӗн театр залӗнче савӑнӑҫлӑн уҫрӗҫ. Унта пӗтӗм республикӑри педагогсем пухӑннӑ. Фестиваль ячӗ хӑех калать: «Асам». Вӑл Патшалӑх Думин депутачӗ Алла Салаева куратор пулса тӑракан проектӑн тупсӑмне тӗп-тӗрӗс пӗлтерет. Шухӑш мӗнле ҫурални пирки Чӑваш Енри хӗрарӑмсен Союзӗн председателӗ Наталья Николаева, проект пуҫламӑшӗнче тӑраканскер, каласа кӑтартрӗ:

– Алла Леонидовнӑпа иксӗмӗр шкул театрӗсем ҫинчен шухӑша кайсан мӗнрен пуҫламаллине тӗпӗ-йӗрӗпе ӑнланмарӑмӑр. Ҫӗршывра хатӗр йышӑнусем пулман. Анчах шӑпах ҫакӑ пире ирӗклӗх пачӗ – эпир хамӑр ҫула шырама пултартӑмӑр. Паян шанчӑклӑн калама пулать: проект пулчӗ. Виҫӗ ҫул хушшинче фестиваль 356 шкулти 13 пин ытла шкул ачине пӗрлештерчӗ. Пин ытла спектакль лартнӑ. Пӗрремӗш ҫул экспериментлӑ пулчӗ. Унӑн пӗтӗмлетӗвӗсене тимлӗн тишкерчӗҫ. Тӗп ыйту театр хатӗрленӗвӗллӗ педагогсем ҫукки пулчӗ. Ҫак тӗллеве Культура министерствипе, Вӗренӳ министерствипе тата профильлӗ тытӑмсемпе пӗрле татса пама май килчӗ. Паян ӗнтӗ шкул театрӗсен 300 ертӳҫи вӗренсе тухса тата малалла вӗренеҫҫӗ. Вӗсем Борис Щукин ячӗллӗ Театр институчӗн тата Чӑваш культурӑпа искусство институчӗн специалисчӗсем хутшӑннипе Вахтанг шкулӗн методикине тӳлевсӗр алла илеҫҫӗ. Юлашки педагогсене хатӗрлемелли тӗп площадка пулса тӑчӗ. Наталья Николаева палӑртнӑ тӑрӑх, стартра тепӗр пысӑк фактор палӑрнӑ – ачасем сценӑпа чунтан кӑсӑкланни. Шухӑш илӗртет пулсан вӑл результат парать: ачасем уҫӑлаҫҫӗ, шанчӑклӑрах та тӗллевлӗрех пулаҫҫӗ. Ҫакна хутшӑнакансем хӑйсем те ҫирӗплетеҫҫӗ. Шупашкарти 43-мӗш шкулта вӗренекен Диана Владимирова театр студийӗнче иккӗмӗш ҫул тӑрӑшать:

– Эпӗ унта ӑнсӑртран килтӗм, ҫӗннине тутанса пӑхасшӑнччӗ ҫеҫ. Халӗ вӑл – чи юратнӑ ӗҫсенчен пӗри.

– Репетицисем вӗренме чӑрмантармаҫҫӗ- и?

– Пачах урӑхла, пулӑшаҫҫӗ. Эпир пуҫаруллӑрах, яваплӑрах пулса тӑтӑмӑр. «АСАМ» фестиваль уҫӑлма пулӑшать, пире тухса калаҫма питӗ килӗшет. Паллах, пурте актер профессине суйламӗҫ. Анчах пӗрремӗш кӑтартусем пур ӗнтӗ: пӗлтӗр шкул театрӗсенчен вӗренсе тухнӑ ултӑ ҫын Щукин ячӗллӗ Театр институтне вӗренме кӗнӗ.

– Чи пӗлтерӗшли, – палӑртать Алла Салаева, – ачасем хутшӑну хӑнӑхӑвӗсене, шанӑҫа, халӑх умӗнче хӑйсене тытма пӗлнине алла илеҫҫӗ. Ку – ӗмӗрлӗхе кирлӗ багаж.

Депутат педагогсене, йӗркелӳҫӗсене тата ҫамрӑк артистсене тав турӗ, ҫавӑн пекех проекта сӑмахпа кӑна мар, ӗҫпе те ырланӑ Чӑваш Ен Пуҫлӑхӗ Олег Николаев рольне палӑртрӗ. Фестиваль ҫӗнтерӳҫисем хальхи йышши оборудовани илеҫҫӗ. Сӑмахран, пӗлтӗр Шупашкарти 43-мӗш шкул коллективӗ «Шурӑкаҫ» спектакльшӗн музыка техники туянма 500 пин тенкӗлӗх сертификат илнӗ.

– Пирӗн опыт хӑйне евӗрлӗ, – палӑртрӗ Алла Салаева. – Эпир шкулсемпе театрсене, педагогсемпе профессионалсене пӗрлештертӗмӗр. Учительсем хатӗрлемелли тытӑм йӗркелерӗмӗр, унпа кирек хӑш шкулта та – хулара та, ялта та – усӑ курма пулать. Проект «Пӗрлӗхлӗ Раҫҫейӗн» «Кӗҫӗн тӑван ҫӗршыв культури» парти пуҫарӑвӗ шайӗнче регионти министерствӑсемпе Чӑваш Енри хӗрарӑмсен Союзӗ хутшӑннипе пурнӑҫланать.

– Культурӑпа вӗренӗвӗн вӑйлӑ союзӗ пулса тӑчӗ, – палӑртрӗ вӗренӳ министрӗ Дмитрий Захаров.

Кунпа депутат та килӗшет:

– Ку Чӑваш Енри чи лайӑх практикӑсенчен пӗри пулнине ӗненетӗп. Ӑна сармалла. Паян республика федераци шайӗнче масштаблама май паракан модель йӗркеленӗ ӗнтӗ. Шкул театрӗсен аталанӑвне «Пӗрлӗхлӗ Раҫҫей» партин Халӑх программине ашшӗ-амӑшӗн пуҫарӑвӗ пек кӗртме сӗнеҫҫӗ. Проектпа кӑсӑкланнине федерацири СМИ тимлӗхӗ те ҫирӗплетет: фестиваль пуҫланни пирки пӗрремӗш кунах ҫӗршывӑн ертсе пыракан кӑларӑмӗсем пӗлтернӗ.