Муркашра А.Г. Николаев космонавт ячĕпе хисепленекен ача-пăча библиотекинче Пĕтĕм Раççейри иккĕмĕш çемье фестивалĕн муниципалитет тапхăрĕ иртрĕ. Ăна укçа-тенкĕ перекетлĕ тытма тата инвестицисем хывма вĕренес ĕçе халалланă. Шăпах çемьерен пуçланмалла та укçа-тенкĕне хаклама хăнăхасси.

- Фестивалĕн тĕп тĕллевĕ - çынсене ĕçлесе илнĕ укçа-тенкĕне пĕлсе перекетлĕ тытма вĕрентесси. Финанс пĕлĕвне ÿстерни укçа-тенкĕне упрама пулăшать, ултавçăсенчен хăтăлма май парать, - терĕ Муркаш муниципалитет округ пуçлăхĕн çумĕ Рената Ананьева фестивале уçса. Çавăн пекех «Россельхозбанк» АО Муркашри хушма офисĕн ертÿçи Ирина Павлова саламларĕ.

- Финанс пĕлĕвĕ паян уйрăмах кирлĕ. Шкул ачисемпе тĕл пулсан вĕсем çак темăпа кăсăкланни сисĕнет. Тепĕр чухне вĕсем ашшĕ-амăшĕнчен те ытларах пĕлеççĕ, - терĕ вăл.

Округ тапхăрĕнчи конкурса Любовь тата Олег Смирновсен, Анна тата Эдуард Спиридоновсен, Натали тата Алексей Петровсен, Ольга тата Валерий Димитриевсен çемйисем хутшăнчĕç. Вĕсем хăйсен пĕлĕвне, ултавçăсенчен хÿтĕленмелли мелсене кăтартрĕç.

- Вăйă питĕ интереслĕ иртрĕ. Çĕннине нумай пĕлтĕмĕр, - терĕ Эдуард Спиридонов. Конкурсра Спиридоновсен çемйи çĕнтерчĕ те. Вăл округ чысне июнĕн 21-мĕшĕнче Канашра иртекен регион тапхăрĕнче хÿтĕлет. Фестивале хутшăнакансем вара дипломсемпе сертификатсене, асăнмалăх призсемпе парнесене тивĕçрĕç.