Апрелĕн 16-мĕшĕнче Муркаш муниципалитет округĕнче Пĕрлехи информаци кунĕ пулчĕ. Ăна ирттерме Чăваш Республикин Гражданла оборона тата чрезвычайлă лару-тăру ĕçĕсен министрĕн çумĕ Эдуард Маринкин килчĕ. Чи малтанах информаци кунĕ шайĕнче йышăну иртрĕ. Эдуард Маринкин, Муркаш округĕн пуçлăхĕн пĕрремĕш çумĕн тивĕçне пур­нăçлаканĕ - территорисене хăтлăх кĕртессин тата аталантарассин Андрей Мясников йышăну ирттерчĕç. Ĕç кунĕ Хорнуй территори пайĕнче иртрĕ. Тойкилтĕри Культура çуртĕнче çынсем самай пухăннăччĕ. Кун йĕркинчи пĕрремĕш ыйту Аслă Çĕнтерÿ 80 çул çитнине халалланă мероприя­тисем пирки пулчĕ. Андрей Мясников округра юбилей мероприятийĕсене ирттерессипе пал­лаштарчĕ. Кăçалхи уяв анлăн иртет: «Вилĕмсĕр полк» акци, уяв концерчĕ, йăлана кĕнĕ çамрăк армеецсен парачĕ, палăк умне чечек кăшăлĕсем хурасси... Йăлана кĕнĕ тата çĕнĕ интерактивлă площадкăсем ĕçлĕç. Аслă Çĕнтерÿ кунне уяв са­лючĕ вĕçлет. 80­мĕш уяв асра юлмалла иртĕ. Округра пĕтĕмпе Тăван çĕршывăн Аслă вăрçине хутшăннисене халалланă вырăн 71, вăл шутра палăксем, мемориал объекчĕсем. Уявччен вĕсене тирпейлесе çĕнетĕç. Эдуард Маринкин Шупашкар хулинчи уяв саманчĕсем çинче чарăнчĕ, унта хутшăнма чĕнчĕ. Республикăра «Победный май», «Мода Победы» проектсем иртнĕ çулсене аса илтерĕç. Кăмăл тăвакансем çĕнтерÿ çулĕнчи çуркуннехи тум тăхăнма пултараççĕ. Хорнуй территори пайĕн ертÿçи Манефа Ко­лесникова каланă тăрăх, вĕсем аслă уява хатĕр­ленсе пыраççĕ. Çак вăхăт тĕлне территоринчи тăватă палăкран иккĕшне тирпейленĕ, уявччен ытти ĕçе те вĕçлеме палăртаççĕ. Вырăнсенче уяв майăн 8­мĕшĕнче иртет, Муркашра – майăн 9­мĕшĕнче. Тепĕр ыйту Чăваш Республикинчи юлаш­ки 5 çулти экономика ÿсĕмĕ пирки пулчĕ. Унпа Эдуард Маринкин паллаштарчĕ. Республика çитĕнĕвĕ Атăл çи федераци округĕнче те курăмлă. Муркашсем те япăх мар ĕçлесе пыраççĕ. Андрей Мясников каланă тăрăх, вырăнти хар­пăр хăй тупăш шайĕ çав тапхăрта 1,9 хут ÿснĕ, иртнĕ çулхи кăтарту 392 млн тенкĕпе танлаш­нă, тавар туса илсе сутлăха ăсатни, инвестици калăпăшĕ тата ытти кăтарту ÿснĕ. Хорнуйсем те ÿсĕмлĕ ĕçлеççĕ. Вырăнти пуçлăх каланă тăрăх, пуçарулăх бюджечĕн программине хутшăнса вĕсем 2017 çултанпа 33 млн ытла тенкĕлĕх 25 объектра тĕрлĕ ĕç тунă. Юлашки вăхăтра терри­торинчи ял пĕвисене тасатассипе ĕçленĕ, ку ĕç малалла пырать. Çурхи пушар хăрушсăрлăхĕн тапхăрĕ пуçланчĕ. Патшалăх пушар надзорĕн районти уйрăмĕн пуçлăхĕ Андрей Сорокин вут çулăмпа асăрхануллă пулмаллине аса илтерчĕ. Ку тĕлĕш­пе йĕркене пăсакансене штраф кĕтнине асăр­хаттарчĕ. Аса илтеретпĕр, ал айĕнче сыхлăх хатĕрĕсем пулсан та, çак тапхăрта çÿпĕ­çапă тав­рашĕ уçă вырăнта çунтарма юрамасть. Йĕр кене пăсакансене 5 пин тенкĕрен пуçласа 15 пин тенкĕ таран штраф тÿлеттерме пултараççĕ. Округра çак вăхăт тĕлне 15 хутчен пушар тухнă, айăпли­сем тĕлĕшпе 4 протокол çырнă, яваплăха кĕртнĕ. «Газпром газораспределение Чебоксары» АОн Муркашри филиалĕн ертÿçи Сергей Попов газ оборудованийĕсемпе усă курнă чухне асăр­хануллă пулмалли пирки каларĕ. Округ пуçлăхĕн çамрăксемпе ĕçлекен со­ветникĕ Михаил Николаев çынсене федерацин «Хăтлă хула хутлăхне йĕркелесси» проекчĕ шайĕнче Муркаш ялĕнчи хăтлăх объекчĕшĕн сасăлама чĕнсе каларĕ. Çынсем информаци ушкăнĕ валли ыйтусем хатĕрленĕ. Тойкилтĕри Культура çуртĕнче юсав ĕçĕсем тахçанах туман, ăна çĕнетме ыйтаççĕ вĕсем. Вырăнти çулсене юсама ыйтаççĕ. Пĕ­вене ферма территорийĕнчен таса мар шыв аннине пĕлтерчĕç, унта çитсе пăхма калаçрĕç. Çынсем Шаптакри çула юсанăшăн, вырăнти библиотекăна çĕнетнĕшĕн тав турĕç. Информаци ушкăнĕ «Куснар» агрофирмăна çитсе курчĕ. Кунти ĕçе ертсе пыракан Михаил Михеев ферма ĕçĕпе паллаштарчĕ. Çак вăхăт тĕлне кунта выльăх йышĕ 837 пуç, вăл шутра су­малли ĕнесем - 468 пуç. Коллектив пысăк мар, пĕтĕмпе 15 çын. Пушă вăхăт пачах та çуккине каларĕ ертÿçĕ, çур аки пуçланчĕ, ун хыççăн -выльăх апачĕ хатĕрлемелли вăхăт.

Роза ИЛЛАРИОНОВА.