Ака уйăхĕн 12 - 13-мĕшĕсем. Тăван тавралăха сăнакан уйăх тулнине асăрхатех ĕнтĕ. Пĕр çул тата нумай çул ÿсекен чечексемсĕр пуçне халĕ ытти культурăна акма сĕнÿ çук. Маларах акнă чечексене сайралатмалла. Çак вăхăтра ÿсен-тăрана шăварма тата минераллă удобренипе апатлантарма, сăтăрçăсемпе кĕрешмемеллĕ. Помидор, пăрăç, баклажан, физалис калчисене пысăкрах шăнăçсене куçарса лартма юрать.

Ака уйăхĕн 14-мĕшĕ. Çак кун уйăх календарĕпе килĕшÿллĕн пÿлĕмри ÿсен-тăрана шăварни мелсĕр шутланать. Теплицăри е чÿрече умĕнчи çĕре кăпкалатăр, шăтнă калчасене сайралатăр. Розăсене лартма тата куçарса лартма хатĕрленĕр.

Ака уйăхĕн 15 - 16-мĕшĕсем. Халĕ вăрлăх акни, лартни, куçарса лартни тата ÿсен-тăранпа ытти ĕçсене пурнăçлани меллĕ шутланмасть. Акнă-лартнă калчасене сайралатăр, хăвăр плансене пăхса йăрансем хатĕрлĕр, çÿп-çап пуçтарса пахчана тирпейлĕр.

Ака уйăхĕн 17 - 18-мĕшĕсем. Садри улма-çырла йывăççисене касма, тураттисене иртме тăхтăр. Уйăх календарĕпе ÿсен-тăрана шăварма тата органика удобренийĕпе апатлантарма меллĕ вăхăт пулнине шута илĕр. Калча тума хăяр вăрлăхĕ акма тăрăшăр. Çĕр улми вăрлăхне яровизацилеме кăларса хурăр.

Ака уйăхĕн 19 - 20-мĕшĕсем. Çĕр пулса çитнине кура ир пулакан çĕр улми лартма юрать. Шăрăха тÿсĕмлĕ чечексене те çак кунсенче акăр, çурхи ыхра лартма тăрăшăр. Улма-çырла йывăççисен сăтăрçисемпе вăхăтра кĕрешни эффективлă пулнине шута илĕр. Халĕ улмуççи, груша, чие, слива, ирга, роза, жимолость лартма меллĕ вăхăт. Çĕре кăпкалатни лайăх.

Ака уйăхĕн 20-мĕшĕ - Мăнкун.

Ака уйăхĕн 21- 22-мĕшĕсем. Йăран çине ир пулакан редис акма вăхăт тупăр. Çÿллĕ ÿсмен помидор калчисене куçарса лартăр. Улма-çырла йывăççисен сăтăрçисемпе кĕрешни вырăнлă шутланать. Йăран çинчи ÿсен-тăра органика удобренийĕпе Апатлантарма тăрăшăр.

Ака уйăхĕн 23 - 24-мĕшĕсем. Пахча çимĕçе акма-лартма мелсĕр кунсем. Теплицăсемпе парниксене ĕç сезонне хатĕрлессипе малалла ĕçлеме лайăх вăхăт. Йăрансене полиэтилен хутпа витсе ăшăтăр. Улма-çырла йывăççисен сăтăрçисемпе кĕрешсе им-çам сапăр. Сад-пахчари ÿсен-тăрана органика удобренийĕпе апатлантарăр.

Ака уйăхĕн 25 - 26-мĕшĕсем. Ÿсен-тăрана шăварăр тата органика удобренийĕпе апатлантарăр. Йăран çине кишĕр акăр. Пÿрте е теплицăна акнă калчасене сайралатăр. Йăрансем хатĕрлĕр. Улмуççисемпе тĕмсем тавра тата çĕр çырли ÿсекен йăрансем çине органика удобренийĕ хурăр.

Ака уйăхĕн 27 - 28-мĕшĕсем. Çĕр улми лартмалли ана пиçсе çитрĕ пулсан, ăна сухала-малла тата культивацилемелле. Хатĕр çĕр çине пуçлă сухан, çурхи ыхра, ир пулакан çĕр улми лартма юрать. Йывăç-тĕмсене сăтăрçăсенчен хÿтĕлеме им-çампа пĕрĕхмелле. Улмуççи, груша, чие, слива, ирга, роза лартмалла, вĕсене çийĕнчех апатлантармалла.

Ака уйăхĕн 29 - 30-мĕшĕсем. Сад-пахчари лăпкăлăх кунĕсем. Нимĕн те акма, лартма, куçарса лартма, сайралатма юрамасть. Ÿсен-тăранпа ытти ĕç пурнăçлама та сĕнÿ çук. Çум курăкĕпе кĕрешни çеç ытлашши пулмĕ. Анасем çине органика удобренийĕ хывмалла. Малашлăха пăхса им-çам туянмалла. Çу уйăхĕ валли паянах ĕç планĕ хатĕрлемелле.