Ятарлă çар операцине хутшăнакан Кирилл Храмов Мăн Сĕнтĕр шкулĕнче тĕл пулу ирттернĕ. Вăл хăй те çак шкулта вĕреннĕ. Черетлĕ отпускра салтак тăван шкула çитсе курма, çамрăк ăрупа тĕл пулса калаçма шухăшланă. Калаçăва вăл çамрăксене патриотла воспитани парассине халалланă. Аслă класра вĕренекен ачасене Кирилл хăй пирки, кулленхи çар ĕçĕ епле иртни çинчен каласа кăтартнă. Кирилл каланă тăрăх, Раççей яланах хăйĕн пат­тăрĕсемпе хăпартланнă, вĕсем пĕр шухăшласа тăмасăр çĕр­шыва хÿтĕлеме тăнă. Салтаксене вара çĕршыва юратни, çывăх çынсене хÿтĕлес тени хавхалантарса тăрать. Пур йывăрлăха парăнтарма çĕн­терĕве шанни, çывăх çынсем пулăшса тăни вăй парать. Тĕлпулу кăмăллăн ăшă лару­тăрура иртнĕ. Калаçу хыççăн ачасем ăна алă пама, ыталама васканă, салтака тав тунă.