Февралĕн 1-мĕшĕнче Муркаш округĕнче «Физкультурăпа спорт аталанăвĕ» патшалăх программи шайĕнче хĕрарăм командисен волейбол чемпионачĕ пулчĕ. Ăмăртăва 6 команда хутшăнчĕ: Оринин территори пайĕн команди, «Сывлăх», «Ваçкасси», «Искра-Б. Сундырь», Муркаш шкулĕ, «Сĕнтĕр райповĕ». Спорт уявне хутшăннисене округ пуçлăхĕн çамрăксен ыйтăвĕпе ĕçлекен советникĕ Михаил Николаев саламларĕ. Çивĕч кĕрешÿре «Сывлăх» команда чи хастарри пулчĕ, иккĕмĕш – Оринин территори пайĕн команди, виççĕмĕш – «Искра-Б. Сундырь» команда. Лайăх вылякансене те палăртрĕç, «Чи лайăх çыхăнтаруçă» – Татьяна Васютина («Сывлăх»), «Чи лайăх тапăнакан» – Анна Сапожникова (Оринин), «Чи лайăх хÿтĕлевçĕ» – Арина Васильева («Искра-Б. Сундырь»).