Чăваш правительстви 2025 тата планлă 2026 – 2027 çулсем валли Республикăри адреслă инвестици программине çирĕплетнĕ. Йышăнăва регион ертÿçи Олег Николаев алă пуснă. Документра 133 объект çĕнĕрен тăвассине тата реконструкцилессине тата 27 объектпа проект ĕçĕсем пурнăçлассине палăртнă. Пĕтĕмпе 27,2 млрд тенкĕлĕх. 2025 çулта объектсене финанслама 11,5 млрд тенкĕ уйăраççĕ, 2026 çулта – 7,9 млрд тенкĕ, 2027 çулта – 7,7 млрд тенкĕ. Программăпа 11 енпе ĕçлеме палăртнă. Вĕсен шутĕнче Муркаш округĕнчи объектсем те пур. Вĕренÿ енĕпе – Москакассинчи ача сачĕ тата сывлăха сыхлас енĕпе – Муркашри тĕп больница.