Кăçалхи сентябрĕн 8-мĕшĕнче Раççейре пĕрремĕш хут Раççейри халăхсен чĕлхисен кунне паллă турĕç. Вăл РФ Президенчĕн В. Путинăн 2025 çулхи ноябрĕн 4-мĕшĕнчи 798 номерлĕ хушăвĕпе иртрĕ.

Çак куна халалласа Муркаш муниципалитет округĕнче «Ăруран ăрăва – Из поколения в поколение» ятпа республикăри ашшĕ-амăш форумĕ иртрĕ. Кашмаш шкулĕнчи форум питех те анлă тата кăсăклă пулчĕ. Унта ашшĕ-амăшĕ, педагогсем, вĕренекенсен республикăри хăй тытăмлăх канашĕ, вожатăйсем, республика шкулĕсенчи советниксем тата ыттисем пухăнчĕç. Форум ĕçне Муркаш муниципалитет округĕн пуçлăхĕ Александр Иванов, Чăваш Республикин вĕренÿ министрĕн çумĕ Александр Кириллов, «Росдетцентр» ФГБУ ашшĕ-амăшь пĕрлĕхĕпе ĕçлекен специалист Наталия Матвеева, Раççей театрĕпе кино актерĕ Никита Павленко, чăваш кинорежиссер-документалисчĕ Виктор Чугаров журналист, блогерсем тата ыттисем хутшăнчĕç. Форумăн тĕп теми – тăван чăваш халăхĕн ăруран ăрăва куçакан чĕлхи, йăли-йĕрки, юрри-ташши, тĕрри-эрешĕ, апат-çимĕçĕ, ал ĕçĕ, тумĕ. Çак тупра пире асатте-асаннесенчен куçса пырать. Пирĕн вара çакна çамрăксене парса хăвармалла. Эпир хамăр чăваш пулнипе чăннипех те мухтанма пултаратпăр. Форум ĕçĕ çакна тепĕр хут çирĕплетсе пачĕ. Тĕплĕнрех хаçатăн çитес номерĕнче паллаштарăпăр.