«Чăваш чĕлхи» вĕренÿ кĕнекисем пичетленчĕç

Категория: Главные новости Опубликовано: 06.03.2019, 16:10 Просмотров: 415

 

«Чăваш чĕлхи хăйне евĕр хÿхĕм, хитре те илемлĕ. Унра – сар хĕвел ăшши, шăнкăр шыв юххи, тÿлек çил уççи...» – тенĕ Сантăр Аксар çыравçă тата журналист. Унăн пуянлăхĕпе тĕрĕс усă курма, ăна туйма вĕренес тесен кунсерен чăвашла калаçмалла, тăтăшах кĕнекесем вуламалла. Шкулта та чăваш чĕлхи урокĕсем интереслĕ иртеççĕ, тăтăшах çĕнĕ е хушса çĕнетнĕ вĕренÿ пособийĕсем пичетленеççĕ.

Нумаях пулмасть Чăваш кĕнеке издательствинче О.И. Печников, М.Н. Печникова, Н.А. Краснова, Е.А. Мулюкова 8-мĕш классем валли хатĕрленĕ «Чăваш чĕлхи» тата А.В. Блинов, А.В. Егорова, Л.П. Николаева 3-мĕш классем валли çырнă «Кала-ха. Чăваш-чĕлхи» вĕренÿ кĕнекисем пичетленсе тухрĕç.

О.И. Печников тата ыттисем хатĕрленĕ вĕренÿ кĕнеки – хушса çĕнетнĕ кăларăм. Вăл И.А. Андреевпа Р.И. Гурьевăн «Чăваш чĕлхи» вĕренÿ пособийĕсене малалла тăсать. «Тăван шкул», «Чăваш халăх йăли-йĕрки», «Чăвашран тухнă паллă çынсем» тата ытти интереслĕ темăсемпе паллашнă май вĕренекенсем чăваш чĕлхин грамматикине шĕкĕлчĕç, пĕлĕве çирĕплетме тĕрлĕ хăнăхтарусем пурнăçлĕç. Кĕнеке вĕçĕнче чăвашла-вырăсла словарь пур. Кăларăма Федерацин патшалăх вĕренÿ стандарчĕпе килĕшÿллĕн хатĕрленĕ, Чăваш Республикин Вĕренÿ тата çамрăксен политикин министерстви шкулсенче усă курма сĕннĕ.

А.В. Блиновăн «Кала-ха. Чăваш чĕлхи» вĕренÿ кĕнеки кĕçĕн классенче чăваш чĕлхине вĕрентекен альтернативлă кăларăм шутланать. Унччен шкулсенче Г.В. Абрамовăн «Чăваш чĕлхи» е В.И. Игнатьевăн, Н.Н. Черновăн, Л.В. Николаевăн «Чăваш чĕлхи» вĕренÿ пособийĕсемпе усă курнă. «Кала-ха» вĕренÿ кĕнеки тĕрлĕ ĕçлĕ ÿкерчĕксемпе пуян – вĕсемпе усă курса ачасен ыйтсене тĕрĕс хуравламалла, калав е диалог йĕркелемелле, предложенисене вĕçлемелле тата ытти те. Тĕпрен илсен, ку кĕнеке вĕрнекенсене чăвашла тĕрĕс калаçма, чăвашла калаçнине ăнланма хăнăхтарать. Кĕнеке вĕçĕнче чăвашла-вырăсла словарь пур. Кăларăмпа çавăн пекех чăваш чĕлхине хăв тĕллĕн вĕреннĕ чух, кружоксенче е факультативсенче усă курма юрать.

 

Ольга ФЕДОРОВА,

Чăваш кĕнеке издательствин редакторĕ.

Добавить комментарий

Защитный код
Обновить

Архив материалов

Ноябрь 2026
Пн Вт Ср Чт Пт Сб Вс
26 27 28 29 30 31 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 1 2 3 4 5 6