Çуркунне – çут çанталăк чĕрĕл­нĕ вăхăт. Кĕçех шыв-шур типĕ те ял çыннин çуллахи хĕрÿ тапхăр пуçланĕ. Çак вăхăтпа усă курса çынсем сад-пахчара ĕçленипе танах çĕнĕ çурт-йĕр çĕклессипе, капиталлă юсав тăвассипе тимлеме тытăнĕç, хуçалăхсем производствăра кирлĕ сооруженисем тăвассипе тăрăшĕç.

Муркашра вырнаçнă çурт-йĕр проектне тăвассипе ĕçлекен «Инттехс» проект пĕр­лешĕвĕн алăкĕсем юлашки вăхăтра час-часах уçăлса хупăнма пуçларĕç. Хальхи вăхăтра ку уйрăм çынсемпе организацисемшĕн, учреж­денисемшĕн питех те кирлĕ организаци – çурт-йĕре тĕпрен тата реконструкцилессине проектсăр тăваймăн. Унсăр пуçне килти хуш­ма хуçалăхри пурăнмалли çурт-йĕрсĕр пуçне ытти çурт-йĕре тăвассипе ирĕк илме те проект кирлех.

Асăннă организацие Альберт Иванов ерт­се пырать. Вăл каланă тăрăх, çакăнта çирĕм çул патне ĕçленĕ вăхăтра республикăри тата ун тулашĕнчи чылай предприятипе организа­ци, уйрăм çынсем валли çĕршер проект ытла тунă. Вĕсемпе усă курса выльăх-чĕрлĕх усра­малли комплекссемпе фермăсем, производ­ство цехĕсем, административлă çуртсем тунă, уйрăм çынсем валли çурт-йĕр çавăрнă.

– Паллах, пире эпир хатĕрленĕ проект­сем пурнăçа кĕни питĕ савăнтарать, малалла аталанма тата лайăхрах ĕçлеме хавхаланта­рать. Май пур таран эпир çамрăк предприни­мательсене, харпăр хăй ĕçне пуçаракансене пулăшма тăрăшатпăр. Ку тĕлĕшпе Чăваш Ре­спубликин Ял хуçалăх министерствин «Агро­инноваци» учрежденипе питĕ тачă çыхăнса ĕçлетпĕр.

Районта та чылай ĕç туса ирттертĕмĕр – уйрăм çынсем валли çурт-йĕр проекчĕсем вуншар анчах та мар, çĕр урлă та тахçанах иртнĕ. Ярославка, Тренккă, Матьăк, Сыпай, Ятман ялĕсенчи Культура çурчĕсемпе клуб­сене юсаса çĕнетес ĕçсене те проектпа смета документацине эпирех хатĕрлесе патăмăр. Мăн Сĕнтĕр, Йÿçкасси, Очăкасси чиркĕвĕсене тăвас, çĕнетес, юсас ĕçсенче те проектсене май пур таран турăмăр.

Хальхи вăхăтра пирĕн проектсемпе усă кур­са Рыккакасси ялĕ çумĕнче хăмла çитĕнтерсе ăна тирпейлес ĕçсем тума пăхнă тепĕр ком­плекс çĕкленет, – терĕ Альберт Николаевич.

Çÿлерех асăннă ĕçсем проект тума саккас паракансем «Инттехс» проект пĕрлешĕвне шаннине çирĕплетет. Организаци коллек­тивĕ пысăк мар. Кунта ĕçлекенсем – ятар­лă пĕлÿ илнĕ специалистсем. Çак органи­зацире ĕçленĕ вăхăтра чылай специалист пысăк ăсталăх пухнă. Вĕсем халĕ Мускаври, Санкт-Петербургри, Шупашкарти пысăк про­ект организацийĕсенче ĕçлеççĕ.

– Нумаях пулмасть пирĕн патра Карина Павлова (сăн ÿкерчĕкре) ĕçлеме пуçларĕ. Вăл – «хĕрлĕ» дипломлă тăрăшуллă специалист, ĕçе питĕ хăвăрт хăнăхрĕ. Халĕ хăйĕн пĕлĕв­не, кунта ĕçленипе пĕрлех, малалла ÿстерет. Çакăн пек самантсем пире ĕçре малашне те ăнăçлă аталанма май парасса шанатпăр, – терĕ ертÿçĕ.

Пурнăç уттипе тан пыракан, клиентсен шанăçне тÿрре кăларакан коллектив малашне те ÿсĕмлĕ ĕçлессе шанатпăр. «Эпир клиентсемшĕн ĕçлетпĕр. Пахалăхлă проект тутарас текенсене хамăр патра кĕтетпĕр», – теççĕ вĕсем.

Роза ИЛЛАРИОНОВА.