Июлĕн 8-мĕшĕнче Тури чăвашсен музейĕн картишĕнче ирех савăнăçлă сăн-питлĕ ача-пăчапа ашшĕ-амăшĕ пухăнчĕ. Кунта уяв иртрĕ, вăйă вырăнĕсем хатĕрленĕ, талккишпех салтак тÿми чечекĕн пуçĕсене сарса хунă, йывăç сулхăнĕ те пухăнни­семшĕн меллĕ пулчĕ. Сăн ÿкерĕн­мелли вырăна та кашниех çитме тăрăшрĕ.

Музей картишĕнче Чăваш Республи­кин Пуçлăхĕн «Чăваш Енти савăнăçлă çу кунĕсем» проекчĕ шайĕнче Çемье, юрату тата шанчăклăх кунне халалланă «Муркаш енчи сăпка юррисем» муниципалитет про­екчĕн виççĕмĕш фестивалĕ иртрĕ.

Çемье фестивальне хутшăнакансене уяв ячĕпе Муркаш муниципалитет округ адми­нистрацийĕн пуçлăхĕн çумĕ Лилия Тарасо­ва саламларĕ. «Çемье вăл – кашни ачашăн кил-çурт, атте-анне, пичче-аппа. Сирĕн çемьесенче яланах телей хуçалантăр, кил-çуртра ăшă пултăр. Çемьери çыхăну çапла çултан-çул çирĕпленсе пытăр. Çавăн пек чухне кăна пирĕн округ çирĕпрех, çĕр­шыв тĕреклĕрех пулĕ, – терĕ Лилия Юрьев­на саламласа.

Уява пĕтĕм Раççейри «Ачалăх навига­торĕсем» проектăн тĕп эксперчĕ, регионти координаторĕ Наталья Иванова килсе çи­трĕ. «Çак уява эпĕ тинех çитсе куртăм, унч­чен вара ун пирки социаллă сеть тăрăх кăна пĕлнĕччĕ. Муркаш çĕрĕ йăла-йĕркесене упрассипе яланах пултаруллă. Кунта туслă та тăрăшуллă çынсем пурăнаççĕ. Малашне те çапла пултăр», – терĕ вăл.

Çавăн пекех Республикăри хĕрарăмсен пĕрлĕхĕн округри канашĕн ертÿçи Любовь Рыжкова, «Движение первых» юхăмăн округри специалисчĕ Анюта Столярова са­ламларĕç.

«Ачалăх навигаторĕсем» проектăн муни­ципалитетри координаторĕ Алевтина Рож­кова каланă тăрăх, çемье фестивалĕ çемье йăли-йĕркине упрама, ăруран-ăрăва куçар­ма, çемье хаклăхне ÿстерме май парать. Фе­стивальте кашни çемьен хăйĕн кĕтесĕ пулчĕ, вĕсем йăла-йĕркепе, ал ĕçĕпе паллаштар­чĕç. Çемьесем аннесемпе асаннесен пĕчĕк арчисене те илсе тухнă.

Уяв пĕр çемьери пек хаваслă та кăмăл­лă иртрĕ. Активлă çемьесене, тĕрлĕ ĕçре пултарулăхпа палăрнисене диплом парса чысларĕç. Ачасем Л. Митрофанова хорео­граф ертсе пынипе сăпка юррипе çепĕççĕн ташларĕç. Ача-пăча библиотекин ĕçченĕсем кĕнекесемпе паллашма май туса пачĕç.

Пĕчĕк ачасем ашшĕ-амăшĕ ăсталанă илемлĕ коляскăсемпе çула тухрĕç, парад ирттерчĕç. Фестиваль çÿллĕ шайра пулни, йĕркелÿçисем тăрăшни лайăх курăнчĕ. Уяв пурте пĕрле тытăнса çемье хороводне тăни­пе вĕçленчĕ, çакă кашни çынна пĕр самант­лăха ачалăхра туйма май пачĕ.

Роза ИЛЛАРИОНОВА.