Мускавра Пӗтӗм Чӑвашсен Акатуйне уявларӗҫ. Ӑна кӑҫал Раҫҫей Федерацийӗнчи Тӑван ҫӗршыв хӳтӗлевҫин ҫулталӑкне тата Чӑваш Республикинчи Ҫӗнтерӳпе патрио­тизм ҫулталӑкне халалларӗҫ. Уяв ВДНХра республикӑра пурӑнакансемпе унта ҫуралса ӳснисене, Раҫҫейӗн тӗрлӗ регионӗнчи тата чикӗ леш енчи чӑваш халӑхӗн представи­телӗсене пухрӗ. Уява Чӑваш Ен Пуҫлӑхӗ Олег Николаев хутшӑнчӗ.

 «Паян Чӑваш халӑхӗ Раҫҫей Федера­цийӗн мӗнпур халӑхне хӑйӗн йӑлана кӗнӗ наци уявӗпе Акатуйпа саламлать. Халӑхсен туслӑхӗн Фонтанӗ патӗнче чӑвашсем кӑна мар, тӗрлӗ наци хӑнисем пирӗн ӗмӗрсем хушшинчи пӗрлӗхе тата ҫыхӑнусем ҫирӗп­пине палӑртакан вӑйӑ картинче аллисене пӗрлештерчӗҫ. Ҫак енĕпе Раҫҫей Президен­чӗ Владимир Владимирович Путин яланах тимлет, пире кашни халӑхӑн хӑйне евӗр­лӗхне упрама, ҫав вӑхӑтрах ӗмӗрсем хуш­ши йӗркеленнӗ пӗрлӗхе, туслӑха хаклама, упрама вӗрентет», – тесе саламларӗ сцена ҫинчен пухӑннисене Олег Николаев.

Уявӑн ятарлӑ церемонийӗнче Чӑваш Ре­спубликин Пуҫлӑхӗн Указӗпе ҫар тивӗҫне пурнӑҫланӑ чухне кӑтартнӑ паттӑрлӑхшӑн «Чӑваш Республикин Хисеплӗ гражданинӗ» ята Михаил Николаевич Марцев подполковни­ка, СВОна хутшӑнакана, Раҫҫей Федерацийӗн Геройне пачӗҫ.

«Олег Алексеевич, пысӑк награда панӑшӑн тав тӑватӑп. Чӑваш халӑхӗн ывӑлӗ пулнӑ май Чӑваш Республикин Хисеплӗ гражданинӗ ятне тивӗҫнине ӗҫпе ҫирӗ­плетӗп, республика мухтавне ӳстерӗп. Пирӗн пурин те ӑҫтан тухнине асра тытмал­ла, пӗр-пӗрне пулӑшни паян уйрӑмах пӗл­терӗшлӗ, ятарлӑ ҫар операцийӗн зонинче пирӗн каччӑсем фашизма хирӗҫ ҫапӑҫнӑ чухне пушшех те», – тав турӗ Михаил Мар­цев.

«Ҫӗршер ҫул эпир вырӑс халӑхӗпе тата ытти халӑхсемпе пӗрле пурӑнатпӑр, тыр-пул акатпӑр, пухса кӗртетпӗр, заводсем лартат­пӑр, кирлӗ чухне хӗҫ-пӑшал илетпӗр те тӑван ҫӗре хӳтӗлетпӗр. Халь пирӗн ачасем ятарлӑ ҫар операцийӗ вӑхӑтӗнче Аслӑ Раҫҫей инте­ресӗсене хӳтӗлесе питӗ пӗлтерӗшлӗ мисси пурнӑҫлаҫҫӗ. Ҫӗнтерӳ пирӗнте пуласса шан­сах тӑратӑп, Чӑваш Ен вара пирӗн ҫӗршыв малалла ҫирӗппӗн утса пытӑр тесе пурне те тӑвать. Олег Алексеевич Николаев респу­бликӑна ертсе пырса аталану программине хатӗрлеме хушу панӑ. Ку – чи хӑюллӑ ӗмӗт­семпе тӗллевсен программи. 2030 ҫул тӗлне эпир сирӗнпе питӗ лайӑх кӑтартусем патне тухӑпӑр. Кӑҫал вара историре пӗрремӗш хут Чӑваш Ен хӑйӗн бюджетне профицитпа пурнӑҫлать. Олег Алексеевич команди ҫине тӑнипе республика ҫирӗп аталанса пырать», – палӑртрӗ Раҫҫей Федерацийӗн Патшалӑх Думин Финанс рынокӗ енӗпе ӗҫлекен коми­тет председателӗ Анатолий Аксаков.

Уявӑн тӗп сцени ҫинче кунӗпех халӑх ансам­блӗсем, чӑваш эстрада артисчӗсем – чӑваш патшалӑх академи юрӑпа ташӑ ансамблӗ, «Ярды» вокал ушкӑнӗ тата Августина Улян­дина, «Бельканто» классик-ушкӑн, «Ҫеҫпӗл» чӑваш вокал ансамблӗ, «Сявал» фольклорпа эстрада ансамблӗ – пулчӗҫ.

Уяв хӑнисем, ачасемпе вӗсен ашшӗ-амӑшӗсем вӑйӑсем выляма, чӑваш произво­дителӗсен продукцийӗн курав-ярмӑрккинче асӑнмалӑх сувенирсем туянма пултарчӗҫ.

Маҫтӑрсем хӑнасене хушпу, пуканесем, хӑваран тата шӑрҫаран хатӗрсем тума вӗрен­трӗҫ. Ҫавӑн пекех хӑнасем валли Раҫҫей кух­нин ҫуртӗнче уяв кукӑлӗсем, какай шӳрпи, ху­плу, тулӑ пашалӑвӗ, ҫуллахи десерт хатӗрлес енӗпе ӑсталӑх класӗсем иртрӗҫ.

«Паттӑрсен уҫланкинче» чӑваш наци кӗрешӗвӗн турнирне йӗркелерӗҫ. Спорт ӑмӑртӑвӗ «Акатуй» уявӗн тӗп мероприятий­ӗсенчен пӗри пулчӗ. Унта Мускав, Ульяновск, Самар облаҫӗсенчи, Тутарстан, Пушкӑрт, Да­гестан Республикисенчи, Карачай-Черкессин­чи чи вӑйлӑ спортсменсем хутшӑнчӗҫ. Чӑваш Республикин Пуҫлӑхӗ Олег Николаев тӑватӑ виҫе категорийӗнче иртнӗ ӑмӑртусен ҫӗн­терӳҫисене чысларӗ. Вӗсем – Чӑваш Енри Давид Крысов (66 кг) тата Станислав Никифо­ров (81 кг), Дагестан Республикинчи Рамзан Исаков (73 кг) тата Саидмагомед Гаирбеков (100 кг ытла).

Спортсменсемшӗн ку турнир Чӑваш Енре кӗркунне иртекен Пӗтӗм тӗнчери кӗрешӳ наци тӗсӗсен иккӗмӗш вӑййисене суйласа илмелли тапхӑр пулса тӑчӗ.