Утă уйăхĕн 1-мĕшĕнче 2026 çул валли пуçарулăх бюджечĕн программине хутшăнма заявкăсем йышăнма пуçларĕç. Асăннă программа нумай çын­шăн çĕнĕлĕх мар темелле, анчах кăçалтан унăн çĕнетнĕ формачĕ пурнăçа кĕме пуçлать. Чăваш Республикин Пуçлăхĕ Олег Николаев хушнипе асăн­нă программăна курăмлă çĕнĕлĕхсем кĕртнĕ. Çакă вăл çынсене хăйсем пурăнакан территорисене хăт кĕртме ытларах явăçтарассипе çыхăннă.

Маларахри çулсенче ытларах про­ект яллă вырăнсемпе ĕçленĕ пулсан, малашне çак ĕçе хуласене те активлă хутшăнтарма пăхаççĕ. Çĕнĕ програм­ма ячĕ – «Ниме – Халăх бюджечĕ».

Çĕнĕлĕхре пуçарусене сĕнмел­ли енсене нумайлатнă. Çапла вара çĕнĕрен икĕ ен ĕçлеме пуçлать. Вĕсем: çуртсем çумĕнчи территорие хăт кĕртме, электричество çутипе, видеосăнавпа тата пĕчĕк архитекту­ра формисемпе усă курса хăтлăлан­тармалли ен – «Манăн кил хушши»; çамрăксен пуçарăвĕпе пурнăçа кĕрте­кен ен – «Ачасемпе çамрăксен тĕнчи». Ку пуçарусене хуласен общественнăçĕ хускатнă.

Муниципалитетсенчен тăратакан заявкăсен хисепĕн чиккине пăрахăçланă – малашне проектсен йышĕ укçа-тенкĕ çителĕклĕхĕпе тата çын­сен активлăхĕпе çыхăнĕ. Заявкăсене хак парас тытăм улшăннă: вĕсен тĕп акценчĕ – халăх пулăшăвĕ. 500 çын е ытларах алă пусса çирĕплетнĕ проек­тсем 150 балл пухĕç. Хушма баллсене ТОСсем тата çамрăксен организаций­ĕсем тĕкĕ парсан хушса парĕç.

Çĕнĕ программăна пурнăçлама ятарлă хатĕрленÿ кирлине шута илсе Чăваш Республикин Строительство министерстви профиллĕ ведом­ствăсене хутшăнтарса обществăлла ĕç хастарĕсем валли вĕрентÿ семи­нарĕсем йĕркелет. Пур администраци­ре те проектсем хатĕрлекен ушкăнсем тунă. Вĕсем заявкăсене кашни тапхăр­та пăхса пырĕç. Кашни территори вал­ли пăхнă координаторсем пуçарулăх ушкăнĕсене тăтăш пулăшĕç. Ăна вал­ли министерствăсенче яваплă специ­алистсем çирĕплетнĕ. Унсăр пуçне ĕç пахалăхне ÿстерме информаци ма­териалĕсем – буклетсемпе методика хушăвĕсем – хатĕрленĕ.

Заявкăсене çурла уйăхĕн 14-мĕшĕччен «Чувашия онлайн» порталта йышăнаççĕ. Çак вăхăтра пуçарулăх ушкăнĕсен проектсем хатĕрлемелле, ăна çул пама граждансем аллă пусса çирĕплетнине пуçтарса документсе­не вырăнти муниципалитет админи­страцине çитермелле. Авăн уйăхĕн 12-мĕшĕнче «Патшалăх услугисем» порталта сасăлав пуçланать. Çĕн­терÿçĕсене юпа уйăхĕн 27-мĕшĕччен палăртаççĕ.

Проект информацийĕпе тĕплĕнрех народный бюджет.чувашия.рф сайтра паллашма пултаратăр.

ЧР Пуçлăхĕн Администрацийĕн пресс-служби.